2011-8-17 13:19
superposter
[轉]MAMI 絶對百分百真人真事
特此多謝MAMI 提供大量真人真事,,故事情節當中不乏驚嚇,奇情,離奇,香艷
由而家開始,肥蛇女變左做說故事的人架啦,但都請各位多多捧場呀~ (比多d 推薦我丫)
各位準備好未呀,而家開始呢個鬼故之旅架啦~~~READY~~GOGOGO
1)臘腸蒸飯
以下所講ge故事，係一個退休老差骨(「陳Sir」，化名)講俾Mami知ge，陳Sir話呢單案件係佢「當差」多年最難忘ge case。
有一個朝早，陳Sir接到上級指示，要去九龍城寨處理一單「住宅單位發出惡臭」投訴。其實果個單位响過去幾日都一直俾鄰居投訴發出惡臭，但因為果個單位次次都無人應門，所以處理唔倒。
果個單位位於4樓，但陳Sir同佢個拍檔行到2樓已經聞倒惡臭。拍檔就話呢d臭味一定係一窩死老鼠造成，但陳Sir一口咬定唔係死老鼠味，因為呢隻味同死老鼠味好唔同。
當行到去4樓「被投訴單位」門口ge時候，陳Sir聞倒一陣蒸臘腸ge味道 ，當時大約係正午12點鐘，陳Sir相信戶主果日ge午餐應該係蒸臘腸做餸。跟手陳Sir就拍門，之後有一個小妹妹（註﹕大約6/7歲）開門。
小妹妹一打開門，陳Sir同拍檔都有d頂唔順想嘔，因為屋內傳出一股超勁惡臭。之後，陳Sir就表露身份，然後問小妹妹﹕「有無大人响屋企呀?」小妹妹就答﹕「阿媽唔舒服，响房瞓緊覺。」之後陳Sir就叫小妹妹開門，小妹妹跟手就放咗陳Sir同拍檔入屋。
當陳Sir入到屋之後，佢就問小妹妹媽媽响邊度，小妹妹指向一間房，然後話﹕「阿媽話唔舒服要瞓覺，叫我同妹妹自己食完飯之後返學。」(註﹕當時有另一個年紀較細ge小妹妹坐响飯枱做緊功課)
陳Sir同拍檔跟手就行入房，一入到房就見倒一條全身發黑、流緊屍水ge女屍瞓咗响床上面。之後，陳Sir就行入廚房，佢見倒一個噴緊蒸氣ge電飯煲。當佢打開個煲蓋一睇，裡面係一煲差唔多煮好ge白飯，飯面放咗一孖臘腸。
之後，陳Sir就問小妹妹﹕「妹妹，d飯邊個煮架?」小妹妹一手指向房中ge媽媽，一面答﹕「阿媽煮。」之後陳Sir又問小妹妹﹕「爸爸响邊呀﹖」小妹妹就答﹕「爸爸無返嚟。」陳Sir再問﹕「媽媽幾時入房瞓覺架?」小妹妹答﹕「啱啱入房瞓。」之後，陳Sir再問咗小妹妹一d問題，跟住就聯絡其他同事跟進呢單案件。
因為呢單案件太懸疑，所以陳Sir之後都有問番呢單案件ge來龍去脈。所得資料就係，媽媽係因病失救致死ge，同埋已經死咗好多日。小妹妹&細妹都係香港居民，媽媽就係非法入境者，佢偷渡來港主要係為咗照顧兩姐妹ge起居生活。因為係非法入境者，所以媽媽好少出街，亦都唔會同其他人有交流。街坊對媽媽一無所知，只知佢係小妹妹兩姐妹ge媽媽。據街坊所講，以前爸爸每晚都會返屋企，但自從有一晚爸爸&媽媽鬧大交之後，就再無見過爸爸出現。
爸爸原來有另一頭家，佢同媽媽鬧大交係因為佢同媽媽講，無能力再照顧佢地三母女，叫佢地三母女返鄉下過活。當爸爸知道小妹妹ge媽媽死咗之後，佢就決定將兩個女交俾保良局等待有心人領養。爸爸話，小妹妹ge媽媽好驚俾人告發佢係非法入境者，所以從來都唔會結交朋友，同埋除咗爸爸之外，小妹妹三母女响香港舉目無親，無可能會有人照顧佢地。
到底果煲臘腸飯係邊個煮架呢? 呢樣野到宜家都仲係一個謎。初初陳Sir佢地都有諗過係媽媽ge朋友幫手照顧小妹妹兩姐妹，但小妹妹由始至終都係話係媽媽煮飯ge＆無人搵過佢地。另一樣野就係，試問有邊一個人可以日日去一間瞓咗條腐屍，仲要勁臭ge屋煮飯俾人地ge仔女食呢？仲有就係，小妹妹兩姐妹入住保良局之後，從無任何親朋戚友探過佢地（包括爸爸），好明顯佢地真係無乜親朋戚友。
熱愛靈異故事ge人士將呢一單案件歸類為「鬼煮飯」事件。靈界朋友有無咁大力量呢？有人話媽媽唔知自己已經死咗，所以繼續做日常工作，煮飯俾兩姐妹食。咁買餸呢？ 難道小販都可以見倒媽媽？ Oh, no, 越諗越多詭異野添，都係唔好諗咁多na，等你地自己諗答案啦。
2)紅粉佳人
今日唔知點解咁有feel，好! 就講多一個睇樓ge靈異事件俾你地知。呢件事又係由地產經紀提供ge。
好多年前(80年代尾)，地產經紀C小姐帶一對中年夫婦去廣播道一帶睇樓。呢對夫婦係實客嚟ge，佢地睇樓都睇得好認真，並唔係求其望兩眼就算果類客。
响佢地睇最後一個樓盤ge時候，呢對夫婦又係好似之前一樣，一入到屋就自動波參觀全屋。佢地睇完個廳之後，就走咗去睇個浴室。但一睇完個浴室之後，個男人就話唔睇na，要即刻走。老婆問個老公點解唔睇埋先走，個男人就話唔駛睇na。C小姐以為個盤唔啱個男人心水，所以就同佢地離開。
由離開個單位開始，個男人一路都無講過半句說話。去到樓下，當C小姐正想開口同個管理員講再見ge時候，個男人一條友走去個管理員面前，好嚴肅咁問個管理員﹕「XX單位(註﹕即係佢地先前睇果個單位)係咪有人自殺過架?」個管理員即時臉有難色，都唔知點答好。跟住個男人又講﹕「個女仔同我講佢係開煤氣自殺死架。」跟住個管理員就話﹕「好似係呀，我D同事好似有咁提過。」
C小姐登時打個突，佢即刻同個男人講自己初入行做咗無耐，真係唔知呢個單位之前發生過咩事，並唔係有心介紹有問題單位俾佢地。事實上C小姐本身完全feel唔倒呢個單位有問題。
之後，個男人就同C小姐講，佢話一入到浴室，就見倒一個「紅粉佳人」坐响度，個「紅粉佳人」同佢講，話自己係响度開煤氣自殺死ge。個男人覺得「紅粉佳人」來者不善，所以即刻話要走。
C小姐返到公司之後，即刻就問同事呢個單位係咪「有料到」。據佢公司其中一個老臣子講，呢個單位的確有料到，某女藝人就係响呢個單位自殺死架na。但亦都有同事話老臣子記錯咗，女藝人自殺死果個單位係同大廈另一個單位。Anyway，呢件事發生之後，C小姐都唔敢再帶客去睇呢個單位。
3)電話
以下所講ge靈異事件發生响20幾年前，事發地點係屯門醫院。
事發當日新紮師兄(「師兄」)一條友當更，負責屯門醫院急症室通宵更。當晚師兄好黑仔，成晚都未停過手接case。第一單case係涉及人命傷亡ge車禍。呢單野非常難搞，因為肇事司機不顧而去，同埋個死者無身份證明文件响身，所以好難確定係車禍，定係另有別情。之後師兄不斷「接波」，全晚未停過手，忙到一頭煙。
做到天光7點幾，師兄終於有喘息機會。就响師兄坐底休息一陣之後，有一個阿伯(註﹕衣著舉止擺明係一個鄉下人家)行埋去師兄身邊同師兄講﹕「我個仔4點幾鐘打電話俾我，話整親入咗嚟屯門醫院，佢話無乜事，叫我天光先嚟睇佢。唔知我個仔响邊度呢?」
師兄就問阿伯﹕「你個仔叫乜名呀?」阿伯就答﹕「XXX。」之後師兄就查簿，但搵唔倒有阿仔個名，於是就問阿伯有無記錯係另一間醫院，或者其實阿仔已經搞掂返咗屋企。阿伯就實牙實齒咁話無記錯，同埋係阿仔叫佢天光嚟屯門醫院ge。師兄於是再翻睇多一次本紀錄簿，但真係無阿仔個名。
之後，師兄突然靈機一觸同阿伯講﹕「你行入去裡面個布帳，睇下果個係咪你個仔。」跟手阿伯就行咗入去布帳，無耐就傳出阿伯呼天搶地ge聲音.......
雖然阿伯好傷心，但師兄都要公事公辦同阿伯落口供。阿伯好肯定咁講，當晚佢4點幾鐘俾電話聲嘈醒，原來係阿仔ge來電。阿仔以平時一樣ge聲線&語氣同阿伯講﹕「老豆，我整親入咗屯門醫院。不過我無乜事，你唔駛即刻嚟，天光你先嚟搵我啦。」跟手阿仔就收咗線na。
師兄就同阿伯講﹕「阿伯，4點幾鐘ge時候，你個仔已經死咗個囉喎，佢點打電話俾你呀? 你會唔會聽錯呀? 可能係有人打錯電話喎，又或者係第二個人打電話俾你喎。」阿伯就發哂火鬧師兄﹕「X!!!!!!! 佢把聲我聽咗咁多年，我點會聽錯!!!!!!!! 仲要咁啱叫我嚟屯門醫院。」
阿伯走咗之後，師兄覺得好煩惱，因為阿伯所講ge野實在太神怪，點可以做口供呢? 之後，師兄唯有硬著頭皮搵大師兄求救。大師兄聽完成件事之後居然一點兒錯愕也沒有。
大師兄首先教師兄落埋份口供先，跟手就同師兄講，其實神怪事情耐唔耐就會發生， 師兄响未來ge日子都仲有機會遇上。但大師兄叫師兄唔駛驚，其實師兄已經幫咗呢單case ge死者，師兄無即時耍走阿伯，阿伯可以認番個仔，阿仔唔駛死咗都無人知，所以其實師兄係做咗一件好事。
經大師兄教路，師兄總算交倒差。但之後師兄都運滯咗一排，同埋驚咗一輪。據說運滯&時運差ge時候就會見倒靈界朋友/遇上靈異事件；相反，時運高/行運ge時候，就算大大隻靈界朋友企响你面前你都睇唔倒。hehe, 我事運高乜都睇唔倒
後話﹕
關於呢單咁神怪ge野，有一個睇法係....阿伯其實係發夢，係阿仔報夢俾阿伯知自己出咗事，等阿伯去醫院搵自己。我個人認同呢個睇法。