耆英BB騎呢派kiss　撼低夜蒲女

魯芬、黃夏蕙、余慕蓮（余毛）三位「耆英BB」，噚日一身美少女戰士look，喺深水埗出席遊戲活動，大鬥兩位「夜蒲女」石天欣同文凱玲（Connie），三位耆英BB仲大派飛吻，超重口味，好彩夜蒲女Connie都有谷事業線搶鏡，人氣先輸唔晒。余毛話low cut同絲襪濕濕碎，唔算性感，問佢哋覺唔覺比夜蒲女搶鏡？魯芬話：「我哋都有靚過，不過我哋三個靚得過份咗，各有各靚啦！」

[img]http://static.apple.nextmedia.com/images/apple-photos/apple/20131118/large/18ec5p2aaa.jpg[/img]
■Connie（左）同石天欣嘅風頭被「耆英BB」搶晒。

[b]「我鍾意做靚女」[/b]
魯芬喺台上話呢個遊戲多變化，唔使成日睇嚟睇去嗰個台，黃夏蕙又話唔使再聽嘻嘻哈哈，雞汁撈飯，問無綫節目係咪好悶？佢哋即話：「冇，冇針對無綫，係劇情需要，跟對白講。」余毛話無綫有叫過佢返去，但要時間適合先得，佢仲大發嬌嗲話：「我唔鍾意演阿婆、阿嬸，我鍾意做靚女。」講到白韻琹俾周刊話曾同大馬富商離婚兼有個仔，黃夏蕙話唔清楚，但白姐姐同謝偉俊一定唔會離婚，畀空間佢哋和好如初。石天欣話性感由Connie負責，佢又讚三位耆英BB好可愛。Connie之前拍《喜愛夜蒲3》傳同許亦妮爭衫，Connie話之後宣傳見面都唔尷尬喎。

[img]http://static.apple.nextmedia.com/images/apple-photos/apple/20131118/large/18ec5p1aaa.jpg[/img]
■三位「耆英BB」（左起）余慕蓮、魯芬同黃夏蕙聚首一堂，在場大派飛吻。


來源:蘋果日報網站