盛裝出席首映禮　曼聯6小福晒冷

曼聯6小福濟濟一堂，喺星期日出席佢哋套記錄片《The Class of'92》嘅首映禮，齊齊行紅地氈，感受吓做電影主角嘅滋味。「萬人迷」碧咸最歡迎，球迷同影迷爭住攞佢簽名，但佢話自己演技麻麻哋，未來唔會全職拍戲，都係足球事業啱佢多啲。

[b]名人捧場獲撐封爵[/b]
首映喺倫敦舉行，碧咸、傑斯、史高斯、畢特、加利尼維利同菲臘尼維利6名92一代曼聯名將盛裝出席。佢哋嘅家人亦有入場支持，其中碧咸同老婆維多莉亞就帶埋3個仔嚟，細女就冇嚟到。講到套戲嘅內容，碧咸話：「我敢肯定，如果我阿媽睇呢套戲，佢一定會眼濕濕。呢個係我同隊友嘅故事，我哋經歷過開心同唔開心，就算喺艱難嘅處境，我哋都團結一致面對。」
問到自己嘅演技，碧咸就有啲尷尬咁話：「我做戲唔叻㗎，所以入影圈唔係一個好出路，但我幾享受當中嘅過程。」除咗6小福，呢次首映唔少名人到場，包括前阿仙奴隊長阿當斯同The Stone Roses歌手Ian Brown，而One Direction嘅Harry Styles仲化身咸爺嘅小粉絲，爭住合照。有報道指碧咸將會喺新年獲封爵，Harry Styles力撐偶像：「點解佢唔可以封爵？唔通佢唔係我哋嘅國寶咩？碧咸封爵係一件好合理嘅事，或者我早就覺得佢已經係碧咸爵士。」
套戲會講番6小福嘅成長經歷，佢哋點樣喺曼聯青年軍奮鬥、攞青年足總盃冠軍同打上一隊，當然唔少得佢哋合力幫曼聯喺99年成為3冠王。套戲已經喺英國上映，未知香港有冇得上，但DVD已經喺噚日公開發售，我求大俠上網睇，DVD賣12.25鎊（約156港元）一隻。

[img]http://static.apple.nextmedia.com/images/apple-photos/apple/20131203/large/03s5-407p.jpg[/img]
■史高斯（左起）、菲臘尼維利、畢特、傑斯、碧咸同加利尼維利盛裝出席，但講到最型，都係咸爺。路透社


來源:蘋果日報網站