驚天倒掛被撲出 C朗慘過輸歐聯

踏入2014年，皇家馬德里翼鋒基斯坦奴朗拿度（C朗）真係要風得風，要雨得雨，拎完金球獎又受勛，上周六西甲聯賽主場對CF格蘭納達，賽前仲拎埋個金球獎同主場球迷分享光榮，不過人總有遺憾美，C朗雖然攻入一球，協助皇馬2:0勝出，但上半場一個驚天倒掛金勾，就畀對方門將救出，難怪射唔入之後，C朗仰天長嘆。

[b]金球獎閃耀巴拿比奴[/b]
皇馬完成連同盃賽連續4場作客，亦喺C朗攞完13年金球獎後首次返巴拿比奴球場比賽，佢當然帶埋個獎同隊友，以及全場超過8萬球迷慶祝。面對中游分子CF格蘭納達，C朗梗係想入埋波，令呢個慶祝派對更完美，上半場已經不斷向客軍大門狂轟，但一一被客軍門將羅拔圖費南迪斯化解，包括上半場補時階段，C朗接應莫迪歷傳中，嚟一個倒掛金勾，離門僅得7碼，又射得好勁，不過羅拔圖費南迪斯仲可以神救擋出，回身救埋加里夫巴利嘅頭槌補中；C朗睇住呢個美妙射門未能轉化入球，當然氣頂長嘆，搞到好似歐聯決賽12碼射唔入咁大件事。

[b]又入首球領放射手榜[/b]
不過面對皇馬圍攻，羅拔圖費南迪斯縱有幾好身手，喺下半場都要失守，56分鐘客軍後衞迪亞加迪受傷倒地，皇馬懶理繼續攻，結果C朗禁區邊轉身快射，收死羅拔圖費南迪斯，攻入今仗首球，更入咗第22個聯賽入球，西甲神射手繼續領放；76分鐘賓施馬幫皇馬埋齋，順利贏到2:0，連同盃賽9連勝，更難得近7場保清白身㖭，教練安察洛堤真係有啲功力。C朗賽後就好謙虛：「金球獎嘅榮譽係全隊功勞，所以今仗就同大家分享；上半場嘅倒掛真係好靚，可惜對手門將企位好，亦都撲得好，射唔入真係唔好彩。」C朗威風，巴利就慘，上半場被對手踢中要害，半場完就要退下火線，好彩安帥就話巴利傷勢唔算嚴重，休息1、2日就可以好番。

[img]http://static.apple.nextmedia.com/images/apple-photos/apple/20140127/large/27s4-702pzok.jpg[/img]
■C朗下半場終於幫皇馬先開紀錄，未有令捧盃派對掃興。美聯社

[img]http://static.apple.nextmedia.com/images/apple-photos/apple/20140127/large/27s4-703p.jpg[/img]
■C朗（中）上半場驚天倒掛金勾，可惜徒勞無功。美聯社


來源:蘋果日報網站