宴客撞車落選大軍 奧斯爾「歇冬」除黑

德國國腳中場奧斯爾喺過去嗰7日真係黑到爆，先係射失12碼間接連累阿仙奴喺歐聯16強首回合輸俾拜仁慕尼黑0:2，之後又涉嫌揸車揩親個攝影記者。希望佢放完一個禮拜假之後，可以掃走啲黑氣，以最Fresh嘅狀態嚟幫球隊踢嚟緊3月份嘅英超、歐聯同埋英足盃硬仗。
奧斯爾喺上周三場歐聯16強首回合，12碼宴客兼俾隊友法米尼鬧佢懶唔追波，結果喺上周六場英超就被領隊雲格剔出大軍名單，只能夠坐喺阿聯酋球場嘅觀眾席，睇住隊友點大炒新特蘭4:1。不過啲小道消息就話，查實係佢喺對拜仁場歐聯整親腳，雲格為免佢傷上加傷，特登畀佢小休。但係佢放假期間竟然搞出事，涉嫌喺上周五揸車撞親個攝記。英國警方亦證實真有其事：「有人喺2月21日上個禮拜五晚7點18分左右報警，話有架車撞到人。受傷人士係男性、年約30歲，同埋有輕傷。我哋經已同肇事車輛嘅車主進行問話。」警方話事件正處於調查階段，暫時冇人被捕。

[b]叉足電迎戰3月硬仗[/b]
雲格喺阿仙奴踢完上周六場英超後，畀班球員放兩日假，仲批准現年25歲嘅奧斯爾飛返德國同佢嘅家人朋友見面。消息話，奧斯爾預計會喺周二歸隊進行練習，如無意外可以喺周六作客對史篤城場英超披甲。查實教授極少喺球季進行期間特准旗下球員放假外遊，今次佢破例畀奧爾斯咁做，相信係想佢可以叉叉電，以最佳狀態迎接之後嘅硬仗，事關阿仙奴喺3月份硬仗連場，除咗要喺英足盃對愛華頓之外，仲要喺歐聯訪拜仁，同埋喺英超接連鬥熱刺、車路士同曼城。
另外，今夏將會同阿仙奴約滿嘅31歲法國後衞沙格拿，居然向兵工廠要求周薪10萬鎊嘅3年合約。年過30仲咁夠膽獅子開大口，真係儍的嗎？


[img]http://static.apple.nextmedia.com/images/apple-photos/video/20140226/org/1393358597_701e.jpg[/img]


[img]http://static.apple.nextmedia.com/images/apple-photos/apple/20140226/large/aa0401a.gif[/img]


來源:蘋果日報網站