防守經驗不可或缺

上季玩完馬後炮，今季就做預言家，同大家一齊睇吓嚟緊周末有咩好睇。本周傾咩：泰利退出國家隊好正常？

喺陣容同戰術上，英格蘭今屆世盃好需要泰利。首先，英格蘭冇一位中堅拍得住泰利嘅級數，同埋泰利今季表現好好，未有跌watt嘅迹象；再加上，英格蘭被編入死亡之組，更需要堅固嘅防守做後盾。
雖然泰利已經33歲，但體能狀況仲好好，今季29場聯賽，泰利踢咗27場，同埋佢同加利卡希爾鎮守嘅防線固若金湯。車路士今季只係失咗22球，係英超防守最好嘅球隊。泰利今季128次爭頂，頂贏85次，成功率66%，已經好唔錯。喺能力上，𠵱家嘅泰利仲係一位世界級中堅，有力入選任何一支國家隊。
冇咗泰利，英格蘭就只好搵愛華頓嘅菲臘積基爾卡擔正，拍加利卡希爾。雖然菲臘積基爾卡踢法穩健，但大賽經驗遠在泰利之下。同埋，泰利同加利卡希爾喺球會夾咗咁耐，有晒默契；如果佢兩個繼續喺英格蘭國家隊拍檔，誤會肯定較少，可以維持防線嘅穩定。
英格蘭今屆世盃喺死亡之組，同意大利同埋烏拉圭同組。面對強隊，英格蘭肯定要主守，更需要經驗豐富嘅泰利嚟坐鎮大局。可能有人話，今屆英軍牌面好差，就算多個泰利都唔差得遠。但小弟唔係咁睇，比較近年嘅大賽，呢次英軍係少有地以underdog嘅心態出戰，唔會以強隊自居。
英國傳媒同球迷今次冇咩期望，換言之球隊壓力較細。只要英格蘭搵啱自己嘅定位，做好防守，分分鐘會製造驚喜。至於點樣做好防守，泰利就係重要嘅人物。


[img]http://static.apple.nextmedia.com/images/apple-photos/apple/20140314/large/aa0703a.jpg[/img]
■泰利今季爭頂成功率十分高。資料圖片



來源:蘋果日報網站