失勢心淡冇癮退出

上季玩完馬後炮，今季就做預言家，同大家一齊睇吓嚟緊周末有咩好睇。本周傾咩：泰利退出國家隊好正常？

電影《無間道2》，年紀輕輕嘅倪永孝話想收山，仲同琛哥講佛學：「拎起容易放低難，今日我放得低，你應該戥我高興。」當然之後佢背後殺晒國華、甘地等等手下，仲差啲殺埋琛哥㖭。泰利應該唔係信佛，33歲就宣佈退出英格蘭國家隊，大勝熱刺之後仲堅決唔會改變主意，咁放得低，背後原因當然唔係想殺鶴臣、謝拉特之流；但以佢嘅年紀打中堅，應該仲有幾年貨，但連今屆世界盃都唔參與，似乎係派系問題多於年紀問題。
同拜仁長期雄霸德國國家隊、巴塞主導西班牙國家隊嘅情況唔同，英格蘭未有絕對英超球隊做後盾，之前曼聯做過主流，好似碧咸、史高斯、尼維利兄弟等都係國家隊主力。𠵱家到鶴臣時代，佢都教過利物浦，可以睇到佢希望以紅軍為骨幹出征巴西，由委任謝拉特做隊長，到史達寧、佐敦軒達臣等已入選國家隊，預期紅軍係英軍出征巴西嘅大戶。
小弟對紅軍支配英格蘭冇異議，甚至覺得以巴塞化嘅西班牙，能夠橫掃世界球壇，甚至係一件好事，但同樣令車仔系心淡。車仔本身英格蘭兵亦唔多，𠵱家叫得國家隊主力，只得中堅加利卡希爾，A高左閘位置不保，林柏特亦淡出；加上之前犯下咁多醜聞，亦唔見得有國家隊支持，泰利亦都冇癮，退出都好正常。
但睇番英格蘭中堅人選，加利卡希爾、菲臘積基爾卡，唔算得級數高，基斯史摩寧同菲爾鍾斯更得啖笑。老將喺後防嘅作用一向好大，小弟覺得，英格蘭冇泰利，損失肯定比泰利唔打英格蘭大。


[img]http://static.apple.nextmedia.com/images/apple-photos/apple/20140314/large/aa0704a.jpg[/img]
■泰利退出國家隊屬人之常情。資料圖片


來源:蘋果日報網站