《歌手2》最後激戰　G.E.M.唱五月天攞第二

參加湖南衛視《我是歌手2》歌唱比賽嘅G.E.M.（鄧紫棋）已經殺入直路，馮仁昭收到風，嚟緊星期五（28日）播出嘅半決賽，G.E.M.演繹五月天《你不是真正的快樂》獲第2名，輸咗畀唱《在那遙遠的地方》嘅內地歌手韓磊，第3名係唱《Just The Way You Are》嘅張傑，下月4號舉行總決賽歌王歌后之戰，睇嚟係G.E.M.同韓磊拗手瓜，鬥個你死我活，湖南衛視同now芒果台都會直播。
統計過去10集比賽，G.E.M.攞到4冠4亞嘅靚靚成績表，韓磊亦有4冠2亞緊隨其後，而半決賽嘅得分就佔總決賽成績3成，據聞韓磊喺半決賽以大比數拋離G.E.M.奪冠，暫時佔優，坐亞望冠嘅G.E.M.喺總決賽不容有失。總決賽分兩部份比賽，一部份係歌手獨唱，另一部份係歌手搵嘉賓合唱，聽講G.E.M.會搵一位有份量嘅歌手助陣。
日前G.E.M.去長沙錄影半決賽時，有大批粉絲接機打氣，𠵱家喺內地爆紅嘅佢，5月首踏北京舉行演唱會，前日門票開售被秒殺，氣勢如虹；至於半決賽其他歌手成績，曾被淘汰嘅曹格翻生唱《Saving All My Love For You》攞第4，茜拉唱《洋蔥》攞第5，周筆暢唱《光之翼》攞第6，張宇唱《20歲的眼淚》包尾，相信爭冠冇望。


[img]http://static.apple.nextmedia.com/images/apple-photos/apple/20140325/large/25ec7p3aaa.jpg[/img]
■G.E.M.人氣旺，粉絲夾道歡迎接機。微博圖片

[img]http://static.apple.nextmedia.com/images/apple-photos/apple/20140325/large/25ec7p2aaa.jpg[/img]
韓磊

[img]http://static.apple.nextmedia.com/images/apple-photos/apple/20140325/large/25ec7p1aaa.jpg[/img]
■G.E.M.喺半決賽以黑絲出戰獲第2名，輸畀韓磊。微博圖片


來源:蘋果日報網站