普帥轉教熱刺　想搵拉爾拉拿過檔

普捷天奴禮拜二落實成為熱刺領隊，仲要一簽就簽5年；呢位阿根廷籍少帥首要任務，就要幫球隊攞歐聯入場券，但熱刺暗示唔會有大把錢畀佢買人，所以佢上場後第一樣要做嘅嘢，就要清走班瘀血，籌旗將佢嘅修咸頓愛將帶去白鹿徑。

[img]http://static.apple.nextmedia.com/images/apple-photos/apple/20140529/large/29s5-107p.jpg[/img]
■熱刺新任領隊普捷天奴，當然要喺球會嘅隊徽隔籬影靚靚相。互聯網


貴價兵成清洗目標
熱刺周二宣佈委任啱啱辭去修咸頓領隊職位嘅普捷天奴做新帥，雙方簽約5年，據報普捷天奴嘅年薪係350萬鎊，仲成為熱刺主席利維任內第10個領隊；由於普捷天奴同修頓仲有約，所以熱刺要賠番200萬鎊畀修頓。利維睇中現年42歲嘅普天捷奴，最主要原因係佢喺修頓同班英格蘭年輕球員合作得好好，仲令拉爾拉拿、勞基梳爾同積洛迪古斯做咗大國腳。
利維話：「普捷天奴喺經驗同青訓呢兩者之間攞到個平衡點，而喺財政公平條例嘅新世界之下，呢樣嘢係非常重要。艱辛工作正式開始，我哋要通力合作，將球會變得更好。」普捷天奴就話：「我感謝修頓所有人喺過去18個月對我嘅支持。熱刺係間歷史悠久嘅球會，我好榮幸有機會嚟教波。隊內滿佈頂級天才，我真係希望可以快啲開工。」
普捷天奴唔會好似前前任領隊波亞斯咁，有成億鎊軍費畀佢使，佢要簽新球員，首先要踢走啲瘀血，以籌集資金。首當其衝肯定係去夏以3,000萬鎊由羅馬來投嘅阿根廷翼鋒拉美拿；同期加盟嘅西班牙前鋒蘇爾達杜喺英超13/14球季入得6球，同佢嘅2,600萬鎊身價完全唔成正比，故亦大有機會俾普捷天奴叮走。至於英格蘭後衞戴臣雖然係隊長，但實力麻麻，多哥前鋒艾迪巴約就成日惹麻煩，所以佢哋兩個應該都冇得留低。


想擸修頓3英
消息話普捷天奴好想將3個愛徒拉爾拉拿、勞基梳爾同積洛迪古斯帶去白鹿徑，但頭兩個去硬利物浦同曼聯咁滯，所以佢應該淨係有機會簽到養緊傷嘅積洛迪古斯。不過，修頓陣中大把優質英格蘭小將，例如哥林張伯斯、尼達利基尼同埋禾特普斯，加埋克羅地亞後衞洛夫雲同埋法國中場舒尼達連都好有實力，普捷天奴唔愁冇貨揀。

[img]http://static.apple.nextmedia.com/images/apple-photos/apple/20140529/large/aa0501a.gif[/img]

來源:蘋果日報網站